Bíðum eftir nýju barnabarni

Verslunarmannahelgin var alveg yndisleg hér á Torfastöðum.  Húsið fylltist af börnum og foreldrum þeirra, langamma mætti og er hér enn og svo voru væntanlegir foreldrar líka með okkur.  Fannar keppti á Gautreki  og þeir unnu 3ja sætið í B flokknum. 

Ég eyddi öllum sunnudeginum í Hrísholti var þulur á Hestaþingi Loga og var orðin ansi þreytt að loknu mótinu.  Það fór mjög vel fram, veðrið aldrei verið betra a.m.k. 22 stiga hiti allan daginn.  Gestir og keppendur mjög glaðir og gaman að vera meðal fólks sem kann að gleðjast yfir eigin sigrum eða sigrum annarra.

Næsti viðburður verður sennilega sá að Björt fæðir barn.  Hún á von á sér næstu daga og við bíðum spennt.  Nýjast fjölskyldumeðlimurinn stúlkubarn Fannars og Margrétar og systir Storms veitti öllum mikla gleði.  Það gerðu líka sætrri börnin, Andrea, Emil Goði, Óli og svo Stormur.   

Nýjasti fjölskyldumeðlimurinn systir Storms

Við skruppum suður í morgun að skoða litlu systur Storms. Voða flott stúlka kröftug og dugleg að sjúga brjóst móður sinnar. Stormur var ekkert afbrýðissamur, fannst sjálfsagt að fara með ömmu og afa aftur austur.  Foreldrarnir verða að fara af Hreiðrinu í kvöld.  Þá fara þau heim en verið er að laga gólf í herberginu þeirra svo það er betra að Stormur fái að vera með okkur enn um stund.  Ekki leiðinlegt fyrir afa og ömmu.   

Stormur hefur eignast systur

Gleðifréttir.  Stúlkubarn fæddist þeim Margréti Unni og Fannari í dag kl. 18:07.  Hún er 16 merkur nákvæmlega (4 kg) og 53 cm.  Bæði móður og dóttur heilsast vel en bróðir hennar er á Torfastöðum og veit ekkert fyrr en á morgun.  Þá förum við og hittum systur hans.  Verst að ég á ekki myndir en þær koma seinna.

Spennandi dagur, líklegt að Stormur eignist systkini í dag og við nýtt barnabarn.

Margrét og Fannar voru hér í nótt Stormur kom á föstudaginn svo þau langaði að hitta drenginn sinn.  Þau fóru snemma í morgun enda Margrét komin með reglulegar hríðir svo þau þorðu ekki að dvelja lengur hér á Torfastöðum.  Í gær gekk Margrét hér um allt á eftir syninum sem skundaði uppí sumarhúsahverfi eins og ekkert væri.  Móðir hans fékk því góðan göngutúr og ekki ólíklegt að það hafi hjálpað til.  Gaman væri að fá nýja barnabarnið í heiminn fljótlega, þá þarf ekki að bíða lengur, móðurinni léttir burðurinn og við fáum að njóta nýs einstaklings.  Lífið er yndislegt.  Guð gefi að allt gangi vel.

Við kærum okkur ekki um að hugsa um neitt hrun.  Það geta sökudólgarnir gert.  Þeir eru hvort eð er að reyna að hvítþvo sig, allir sem einn.

Agnus Dei, úr Brynjólfsmessu Gunnars Þórðar. Skálholtskór í Berlín 6. júní 2009

Gautrekur IS2003188503 frá Torfastöðum í kynbótadómi

 

Ég var ánægð með hann Gautrek okkar í dag.  Mér finnst hann hafa mjög flotta líkamsbyggingu en dómarar gáfu honum samt ekki hærra en 8,06 fyrir byggingu. 

Það þýðir víst ekki að deila við dómarann en okkur finnst einkunnin 8,0 fyrir háls og herðar ansi nánasarleg og illa rökstudd.

Móðir hans Randalín var með 9,0 fyrir háls og herðar og okkur finnst hann eiga a.m.k. einkunnina 8,5.  En dómararnir ráða. 

Afkvæmi G autreks eru afar hálsfalleg.  Gautrekur fer í yfirlitssýningu á sunnudaginn eftir hádegi.  Þá kemur í ljós endanleg niðurstaða.

 

 

Æfing Skálholtskórs í Berlín í Getshemanekirkjunni 6.6.2009

Ég tók engar myndi sjálf í Getshemanekirkjunni en hér er mynd frá Páli Skúla af æfingunni.  Þarna er Skálholtskórinn ásamt kirkjukór Elisabetar.  Í honum voru um 110 manns.  Svo er þarna líka barnakórinn hennar, það hafa verið um 50 börn.  Alls eru því samankomnir um 180 söngvarar til að flytja íslenskt tónverk.  Verið var að æfa Brynjólfsmessu Gunnars Þórðarsonar en hana fluttum við til Berlinan.  Fluttum þannig út kirkjutónlist Gunnars Þórðarsonar og Gunnar Þórðarson var með, höfundurinn sjálfur.  Það þótti Berlínarbúum og auðvitað okkur líka, alveg æðislegt.  

Brynjólfsmessa Gunnars Þórðar, var frumflutt fyrir þremur árum síðan af Skálholtskór, kór Keflavíkurkirkju og kór Grafarholtskirkju.  Nú hefur Brynjólfsmessa verið flutt í Getshemanekirkjunni í Berlín og það var Skálholtskór og Hilmar Örn Agnarson sem voru forsprakkar þess.  Við klöppum okkur á bakið fyrir það. 

Skálholtskór upplýsti sendiherra Íslands í Berlín í byrjun árs, um að við yrðum með stóra tónleika í Berlín og auðvitað vonuðum við að sendiherran sýndi okkur þann sóma að bjóða okkur til sín en það gekk ekki eftir.  Vorum ansi vonsvikin yfir því, enda töldum við okkur hafa vel til unnið að fá klapp á bakið frá íslenskum yfirvöldum.   En þeir virðast ekki sjá gildi þess að útrás Íslendinga sé með þessum hætti þ.e. í formi þess að flytja út menningu og list frá Íslandi.  Það verður ekkert hrun hjá okkur enda skuldsetjum við engan nema e.t.v. okkur sjálf í útrás okkar.

Skálholtskórinn í Berlín

Við Óli vorum að koma frá Berlín. Skálholtskórinn fór með elskulegum stjórnanda sínum honum Hilmari Erni Agnarssyni.  Ferðin var ákveðin í september 2008, stuttu eftir kveðjutónleika sem haldnir voru fyrir Hilmar í Skálholti rétt fyrir bankahrunið  Smá peningur var til í sjóði, sem kórinn hafði safnað og ákveðið var að eyða honum, enda hefur kórinn formlega verið lagður niður.  Enginn nýr kór hefur verið stofnaður í Skálholti enda enginn organisti kominn til starfa svo við sungum undir okkar gamla nafni. 

Elísabeth hin austurþýska, kórstjóri og góð vinkona Hilmars tók á móti okkur með miklum virtum.  Á flugvellinum mættum við nokkrum kórmeðlimum frá hennar kór og þær leiddu okkur til hótels okkar í lestum og sporvögnum, seint á fimmtudagskvöldinu. Holiday Inn hið fínasta hótel. 

Föstudeginum var eytt í að kynnast Berlin aðeins, sumir fóru undir leiðsögn þýskara aðrir lögðu sig eftir að læra á samgöngukerfið, svo þeir kæmust leiðar sinnar.

Á laugardeginum var æft í Getshemanekirkjunni.  Á æfingunni áttuðum við okkur á hve verkefni okkar og Elísabetar var stórkostlegt. Skálholtskórinn hafði 25 söngvara, kór Elisabetar 100 manns og hljómsveitin 20 manns. Okkur fylgdu bestu hljóðfæraleikarar landsins, Hjörleifur Valsson, Þorkell, Kári Þormar og Ásgeir pákuleikari.

Tónleikarnir voru svo haldnir kl. 17:00.  Kórarnir fluttu saman Berlínarmessu eftir Arvo Pärt og Brynjólfsmessu eftir okkar ástsæla Gunnar Þórðarson.  Auk þess söng Skálholtskórinn tvö íslensk lög milli messuflutninganna. Freyja G klarinettuleikari og íbúi í Berlín lék með hljómsveitinn þrjá klarinettukonserta og svo var nú punkturinn yfir i-ið sá að Gunnar Þórðarson og frú voru með okkur.  Það þótti áheyrendum mjög skemmtilegt.

Ég skrifa meir um ferðina næstu daga.

 

Ánægjuleg sjóðheit Eurovisionhelgi afstaðin. Ég þakka yndislega daga með fjölskyldunni.

Helgin var afar ánægjuleg hjá mér.  Veðrið sólríkt og heitt, í gær voru 18 stig hér í Tungunum.  Líka í Reykjavík á meðan við dvöldum þar. 

Fannar og Margrét buðu okkur í dásamlegan mat á laugardagskvöldið og við horfðum á Jóhönnu Guðrúnu preforma, svaka vel gert hjá henni, alveg óaðfinnanlegt.  Svo fylgdumst við með stigagjöfinni og vorum stolt yfir að vera Íslendingar.  Það er langt síðan hægt hefur verið að fyllast þjóðarstolti svo það var mjög gaman.  Íslendingar áttu mikið að þakka Jóhönnu Guðrúnu þessa helgina.  Stormur var mikill gleðigjafi eins og alltaf, leik við hvern sinn fingur yfir sönglagakeppninni.

Fórum og hittum Bíbí áður en við renndum okkur úr bænum, hún er á St. Jósefsspítala til rannsóknar.  Verður vonandi komin heim innan nokkurra daga.

Sigga og Gunnar hafa verið í bústaðnum um helgina og við kölluðum á þau í mat á sunnudagskvöldið.  Það var alveg ómögulegt að vera inni, svo við borðuðum í æðislegu veðri úti og sátum þar til tæplega 22:00 en þá vorum við að tapa sólinni bak við heiðina.  Sigga dásamaði verðrið og benti á að enn væri bara 17. maí, þjóðhátíðardagur Norðmanna.  Í tilefni af því var myndin tekin.  18 stiga hiti, sól og blíða í allan dag.  Ummmm.

Tungnaraddir undirbúa útrás til Berlínar

Við erum bara lítill kór en ætlum okkur stóra hluti.  Erum að undirbúa þá.  Útrás og Evrópusigrar í Berlín.

Það var afar gaman hér á Torfastöðum í kvöld.  Tungnaraddir héldu æfingu og Tobba sá um hana.  Þau æfðu Brynjólfsmessu Gunnars Þórðarsonar.  Ég er alveg þegjandi hás og gat ekkert sungið með þeim og svo er ég líka með hitavellu.  Dingaði mér bara í húsinu tók nokkrar myndir til að setja á bloggið mitt. 

Sé ekki hvernig ég á að geta kennt á morgun svona þegjandi hás, nema að kraftaverk eigi sér stað í nótt öll hálsbólga hverfi. 

Eftir æfinguna röbbuðu ferðanefnd og stjórn saman og tekin staðan.  Hverjir koma með kórnum og spila,  og svo þetta með einsöngvarana,  t.d. Egill Ólafs.   Þessi mál ekki alveg ljós.  Beðið er eftir okkur með eftirvæntingu í Berlín svo það er eins gott fyrir okkur að koma málum fljótlega á hreint.  Fyrir nokkrum mánuðum töldu menn auðvelt að komast með á lofbrú Flugleiða en það er ekki eins öruggt núna.  En menn munu finna útúr því.  Raggi sveitó er að vinna í málinu skv. nýjustu upplýsingum.  En æfingin gekk vel hjá þeim sem gátu sungið og henni Tobbu sem sá um að stjórna æfingunni.  Þökkum henni öll sem einn.

Stærsti kór sögunnar