Lyngdalsheiðarvegur, nútíma vegagerð.

Vegagerðin opnaði tilboð í framkvæmdir á Lyngdalsheiðarvegi fyrir tveimur dögum.  Húrra.  Nú kemst Þingvallasveit loks í vegasamband við restina af sveitarfélaginu allt árið.  Sex ár síðan að Þingvallasveit, Laugardalur og Biskupstungur sameinuðust. Loksins verður fært allt árið milli staða í sveitarfélaginu Bláskógabyggð. 

Mótmæli Péturs vegna vegarins hafa verið hávær en ekki að sama skapi almenn.  Pétur gólar og galar og Landvernd tekur undir, en aðeins 1300 manns kusu í heimskulegri viðhorfskönnun Landverndar og Morgunblaðsins. Áróðursstríðið tapað.  Nútímasamgöngur verða að raunveruleika í nágrenni Reykjavíkur, ekki lengur 100 ára moldargötur sem við Uppsveitarfólk eigum að láta okkur nægja til að komast á milli staða, eins og Pétur og Landvernd gera kröfur um í áróðri sínum.  Nútíminn heldur innreið sína í samgöngum milli Laugarvatns og Þingvalla.

Framkvæmdir við nýjan Gjábakkaveg hefjast innan tíðar

Foreldralaus börn

Grein Ingibjargar Benediktsdóttur í Morgunblaðinu í dag er orð í tíma töluð.  Öll mín samúð er með þeim sem þjást vegna fjölskylduvanda og fá ekki aðstoð.  Tíminn er stuttur þegar ungmenni eru að valda sér tjóni.  Nauðsynlegt að bregðast skjótt við og snúa erfiðleikunum í sigra.

Var að hlusta á viðtal Guðrúnar Frímannsdóttur, fréttamanns Ruv .og fyrrverandi framkvæmdastjóra Barnaverndar Reykjavíkur við Halldóru Gunnarsdóttur núvernadi framkvæmdastjóra Barnav. Rvk. Hroðalegt hvað sum börn þurfa að þola þegar foreldrar þjást af eiturlyfjafíkn, geðveiki eða öðru sem gerir þau illfær um að vera foreldrar barna sinna.  Börn velja sér ekki foreldra en barnaverndarlögin eru mjög foreldravæn. Svo birtist frétt á mbl.is að Bragi á Barnaverndarstofu ætli að rannsaka vinnubrögð Barnaverndar Reykjavíkur.

Ef ég mætti ráða þá væru úrræði stöðugt fyrir hendi til að aðstoða þá sem hafa áhyggjur af börnum sínum og eiga í erfiðleikum af ýmsum toga.  Barnaverndarstofa hefur fækkað úrræðum undanfarið sem voru til aðstoðar ungmennum og fjölskyldum þeirra. 

Barnaverndarstofa rannsakar málið

Brák IS2002288508 vann 2. sætið

Í gær var gaman. Brák frá Torfastöðum hækkaði fyrir hæfileika í yfirlitinu og hefur fengið í aðaleinkunn 8,19.  Hún hlaut 8,19 fyrir byggingu og 8,19 fyrir hæfileika.  Ég þakka Sigurði Vigni Matthiasyni kærlega fyrir hans þátt í árangrinum.  Hann sýndi hryssuna og gerði okkur stóran greiða enda fór hún til hans óvænt seinnipart vetrar.  Ég tek ofan fyrir Sigurði, dáist að eljusemi hans og dugnaði og heiðarleika.

Það var gaman í Víðidalnum í gær, margir sigurvegarar í mismunandi flokkum og margir ánægðir eigendur.  Aðstaðan þar frábær. 

Fjalar bróðir á afmæli í dag, óska honum til hamingju.  Gunnar mágur og Sigga koma heim frá Englandi í dag en hann var í námsleyfi þar.  Garðbæingar verða glaðir að fá bæjarstjórahjónin heim. 

Blíðviðri á Torfastöðum, Biskupstungun

Vorið er komið til okkar á Torfastöðum blíðviðri, hiti, sannkallað gróðrarveður. 

Sumarhúseigendur njóta staðarins og hrossin kætast.  Fyrsta folaldið komið í heiminn og fleiri á leiðinni.  Setti inn vetrarmynd svo við gleymum ekki alveg síðasta vetri, en hann var mér frekar erfiður.  Nú eru erfiðleikarnir að baki og bjart framundan. 

Vorkenni þeim sem eiga erfitt og hugsa mikið til hörmunganna í Kína og Burma. Blessað fólkið.

Allt að 17 stiga hiti í dag

Brák frá Torfastöðum í kynbótadómi

Fór í bæinn og horfði á hryssuna okkar fara í kynbótadóm.  Hún hækkaði í byggingareinkunn fékk 8,19 og skeiðið hækkaði líka um heilan.  Nú er hún með aðaleinkunn 8,14 þarf bara 0,01 stig í viðbót til að komast á Landsmótið.  Yfirlitsýningin eftir, verður á föstudaginn og þá hækkar hún vonanadi og vinnur sér rétt inn á Landsmótið.  Veðrið var yndislegt og gaman að horfa á flott hross í brautinni. Er að reyna að koma mynd af henni með þessum pistli en veit ekki hvort mér hefur tekist það.  Sé til þegar þetta hefur verið vistað

.

 

 

13. maí 2008 afmælisdagur eiginmannsins.

Í dag er góður dagur, hlýtt og yndislegt veður, vor í lofti og bóndinn á afmæli.  Öll börnin mín erlendis en við höfum notið samveru tengdadótturinnar og Storms litla alla helgina.  Verst að Margrét er orðin lasin og getur ekki farið í síðasta prófið sem hún hefur verið að undirbúa sig undir.

Runólfur vinur okkar átti stórafmæli í gær, langði að heimsækja þau í tilefni dagsins. Það verður að bíða betri tíma. 

Talsverðar annir í gær, Fjalar bróðir sendi flokk manna til að ná í tré sem voru tekin upp hér, Freyja systir kom í heimsókn með fjölskyldu og svo duttu ýmsir inn. Garðar að skoða folöldin, Gunna og Kjartan að skoða graðtitti. 

Fyrsta folaldið kom þann 11. spennandi hryssa, bleikálótt, undan Silkisif og Gautreki.  Körlunum tókst að koma kalda vatninu í gott horf á laugardaginn var, loksins, en loft var á leiðslunni frá söfnunartankinum og allt í volli í nokkra daga.  Nú erum við tilbúin til að taka á móti sumrinu.  Að minnsta kosti tvær veislur verða haldnar í byrjun sumars, Eldur er að ljúka jarðfræðinni og Björt mannauðsstjórnunar náminu.  Bara gaman.

Fórnarlömb ofbeldis

Það er svo sorglegt þegar fólk ætlar þeim sem eru fórnarlömb ofbeldis að þeir eða oftast þær hefðu átt að vita og séu jafnvel samsekar. Konur sem búa við ofbeldi, kynferðislegt, andlegt eða líkamlegt hafa ekki getað brotið sig undan ofbeldinu og eru því þolendur þess.  Þær eru skelfingu lostnar, og vita ekki sitt rjúkandi ráð.  Þær eru ofurseldar ástandinu.  Því er mjög ósanngjarnt að gera þær að sakborningum, ásaka þær um að vita, en hafa ekkert gert í málinu.  Staðan væri allt önnur ef eiginkona brjálæðingsins hefði getað brotist gegn honum. Þá hefði málið opnast fyrr en því miður var máttur eiginkonunnar enginn og því gat ofbeldismaðurinn gert það sem honum sýndist.  Gerum því þolendurna aldrei að sakborningum.

Rosemarie Fritzl yfirheyrð

Lyngdalsheiðarvegur, umfjöllun Landverndar bull og þvæla.

Mér blöskrar svo þetta kosningabull.  Vegstæðið sem um ræðir kemur aldrei inní Þjóðgarðinn, því hefur það engin áhrif á hann.  Lyngdalsheiðarvegur er tenging milli Laugarvatns og Þingvallasveitar sem nú verður heilsársvegur en ekki sumarslóði eins og Gjábakkavegur er.  Ef menn vilja í framtíðinni gera veg til Reykjavíkur án þess að fara um þjóðgarðinn þá kemur Lyngdalsheiðarvegur ekki í veg fyrir slíka framkvæmd.  Það er bara ný ákvörðun um nýtt vegstæði sunnan Þingvallavatns. Ef Landvernd vill vinna að slíkri framkvæmd á ég von á að hún fái fullan stuðning sveitarstjórna Uppsveitanna á vegi sunnan Þingvallavatns.

Hvetja til þátttöku í kosningu um Gjábakkaveg

Gjábakkavegur, Lyngdalsheiðarvegur

Ýmsir hafa bullað mikið um nýjan veg milli Laugarvatns og Þingvalla.  Árið 2002 hóf sveitarstjórn vinnu við að láta skipuleggja heilsársveg milli Þingvalla og Laugarvatns enda svæðin þá sameinuð í eitt sveitarfélag.  Núverandi vegur var og er aðeins sumarleið, opinn þrjá mánuði ársins.  Það vantaði og vantar enn, heilsársveg um svæðið, veg sem hægt er að aka allan ársins hring. 

Á núverandi vegi verða flest slys á landinu, hæst slysatíðni, skv. upplýsingum Vegagerðarinnar.  Það var ekki viðunandi. 

Það yrði ekkert minni umferð um Gjábakkaveg, þótt  núverandi vegur yrði hækkaður og lagfærður.  Krafan var og er að fá nútímalegan veg, beinan og hættulítinn. 

Áróður spekinga um að eitt vegstæði mengi minna en hitt er þvæla og ekki svara verð.

Fullyrðingar um að nýr vegur setji heimsminjaskráningu Þingvalla í hættu er líka bull, enda hefur UNESCO alltaf haft upplýsingar um það, að byggja ætti nýjan veg í nýju vegstæði. Sá vegur kemur hvergi inn í þjóðgarðinn. 

Almenningur segi álit sitt á Gjábakkavegi

Meðferð fyrir ungmenni í vanda

"Eitthvað stendur til" í meðferðarmálum ungmenna, en á meðan hefur fjölda meðferðarstaða verið lokað.  Skjöldólfsstaðir stóðu til, í ein tvö ár. Svo setti Barnaverndarstofa þá á fót en lokaði skömmu síðar eftir stutt starf.  Hvítárbakki náði að starfa í 9 ár, en Inga og Sigurður hættu síðastliðið haust og nokkrum mánuðum síðar var staðnum lokað.  Meðferðarheimilið Torfastöðum hætti eftir 25 ára starf í lok árs 2004.  Rekstur Háholts var auglýstur laus til umsóknar fyrir fáeinum vikum. 

Vinna við að aðstoða börn og fjölskyldur þeirra er alveg hrikalega erfið og vandasöm, einkum þegar börn eiga við alvarlegan hegðunarvanda að stríða.  Það þarf mjög þjálfað og öflugt fólk í slíka vinnu. Reynslan sýnir að Barnaverndarstofu hefur ekki verið umhugað um að halda í mikla reynslu og færni fólks í meðferðarmálum ungmenna, en stofan leggur áherslu á eitthvað nýtt. 

Hvað er gert fyrir ungmennin sem eiga í vanda í dag á meðan beðið er eftir MST kerfinu?  Fréttir og nýbirtar rannsóknir um aukinn vanda ungmenna eru ægilegar.

Barnaverndarstofu hefur stefnt að því í mörg ár að setja á fót MST meðferðarkerfi.  Um það ræddu starfsmenn hennar við okkur á Torfastöðum, fyrst árið 1999.  Síðan eru liðin 9 ár.  Loksins hefjast þeir handa.  Skjöldólfsstaðir var hugarfóstur BVS og þeirra verk.  Hætt var rekstri stuttu eftir opnun. Vonandi gengur næsta verkefni Barnaverndarstofu betur.

Fjölþáttameðferð vegna hegðunarvanda barna