Tungufljót lofar líka góðu

Tungufljót í Biskupstungum er að verða mjög spennandi laxveiðiá.  2400 laxar voru skráðir veiddir á síðasta sumri.  í lok maí s.l. var samþykkt að stofna veiðideild um Tungufljótið, neðan fossins Faxa.  Þá mun komast skikk á veiðar og félagið mun geta sett sér reglur og leigt út ána.  Árni Baldursson hefur gert stórvirki í að rækta lax í Tungufljóti en þar sást ekki lax áður en hann hóf ræktun í ánni árið 2004.

Veiðar hafnar í Elliðaám

Athugasemdir

[Einar H. Björnsson, 20.6.2009 kl. 11:40]

Það er ánægjulegt að heyra að veiðiréttareigendur um Tungufljót, neðan Faxa, skuli hafa náð saman um að stofna veiðideild um ána. 

Þessi á fóstrar ekki lax og er því ekki laxveiðiá frá náttúrunnar hendi.  Því hefur verið brugðið á það ráð að sleppa í hana gönguseiðum af Hvítárstofni (að sagt er), sem síðan ganga til sjávar og dveljast þar í 1-2 ár, eða þangað til þau verða kynþroska.  Síðan leitar laxinn heimkynna sinna á nýjan leik til þess að hrygna, en sú hrygning er dæmd til þess að mistakast í þessari á.  Er þetta ræktunarstarf?  Nær væri að kalla þetta hafbeit og þessi á er því hafbeitará.

Það er auðvitað ekkert við það að athuga þó að veiðiréttareigendur leitist við að hafa tekjur af ám sínum og vötnum og að arðurinn skiptist eins og lög gera ráð fyrir, en til þess að svo megi verða eru árlegar seiðasleppingar nauðsynlegar - og það í miklum mæli, því mikið af þessum laxi er veiddur í net á leiðinni til heimkynna sinna.

[Drífa Kristjánsdóttir, 20.6.2009 kl. 12:36]

Þakka þér ágæta athugasemd Einar. Rangá er mikil laxveiðiá og flokkast sjálfsagt sem hafbeitará. Vinsældir hennar eru samt miklar og veiðimenn fjölmenna í ána.  Skv. fullyrðingum aðila sem kunna á veiðar og ræktun áa þá munu hrygningar hafa átt sér stað ofan fossins Faxa í Tungufljóti eftir að laxinn náði loks að ganga um laxastigann.  Fullyrt er að í Tungufljóti muni laxinn því geta hrygnt og fullyrðing þín að hrygning muni mistakast er því andstæð fullyrðingum um að Tungfljótið sé ekki bara hafbeitará heldur líka ræktunará.

[Halldór Jónsson, 20.6.2009 kl. 19:02]

Kæri samsveitungi Drífa

Einfaldur prósentureikningur gefur þá niðurstöðu að 17 atkvæði af 26 mögulegum, samkvæmt upptalningu þinni í nýlegu bréfi i til veiðréttarhafa í óskaveiðideild þinni neðan Faxa,   eru 65.38 % En þannig féllu atkvæði á stofnfundi umræddrar veiðideildar. Stofnunin var því í raun og sannleika felld ! 

  Lög um lax-og silungsveiði  tiltaka hinsvegar,  að ekki sé hægt að stofna veiðideild nema með þáttöku 2/3 aðila  atkvæðisbærra veiðiréttarhafa.  Þessi veiðideild þín hefur því aldrei verið stofnuð og þá er líka alger óþarfi að hafa áhyggjur af samþykktum fyrir slíka deild.  

Þú verður því að gera aðra tilraun á aðalfundi Veiðifélags Árnesinga til að fá heimilld til að stofna þessa veiðideild. Þetta verður árið 2010.  Veiðideildina verður svo að samþykkjast löglega á stofnfundi deildarinnar eftir aðalfundinn sama ár.

Ég er alveg tilbúinn að ræða við þig um framtíðarsýn fyrir Tungufljót. Þetta er ein fegursta á  landsins og möguleikar eru án efa óteljandi. En allt verður að vera í samræmi við og samhljómi við Veiðifélag Árnesinga þar sem þetta tengist því víðfeðma vatna-og vistkerfi Hvítár í Árnssýslu. En þetta er vatnsmesta á landsins þegar hún fellur til sjávar. Þett er þvílík náttúruperla að menn verða að ganga fram af fyllstu nærgætni og háttvísi við náttúru þessa gósenlands sem við eigum öll saman.

Þú mátt ekki einblína svona á þrönga viðskiptahagsmuni þína og  Lax-ár og Árna Baldurssonar.  Hér um árið fannst mér alveg makalaust hvað Margeir var bláeygður fyrir hönd okkar Tungnamanna þegar hann mælti svo mjög fyrir samningum við Lax-á. Mér fannst þá og finnst enn að allt of mikill hluti teknanna hefði átt að fara til Lax-ár enn lítið sem ekkert ekkert til okkar Tungnamanna. 

Viðskipti eiga að vera þannig að sanngjörn skipti fari fram .  Mér hefur sagt að Lax-á sé i rauninni útlent auðfélag en ekki félag eldhugans Árna Baldurssonar.  En Árni sjálfur á allan heiður skilið fyrir eldlegan áhuga sinn og stórvirki í veiðimennsku,  það verðu sko ekki tekið af honum. En það er leiðinlegt hvernig ykkur hefur tekist í sameiningu að hleypa  öllu í bál og brand hérna í sveitinni. 

Það væri nær að við ræddu þessi miklu  mál í rólegheitum en ekki að reyna að berja okkur á Bergstöðum til hlýðni með harðýðgi. Það háttar svo til, án þess að við höfum nokkuð til þess unnið, að laxinn liggur mest hérna við landið á Bergstöðum og þetta skapar auðvitað vandamál gagnvart öðrum og veldur okkur sífelldum átroðningi og leiðindum sem við viljum alls ekki hafa. 

Maður á ekki að fara svona að Drífa mín elskuleg. Ef maður vill ná ástum einhvers þá fer maður ekki fram með offorsi. Það er kallað nauðgun og þykir ekki fínt.

[Drífa Kristjánsdóttir, 20.6.2009 kl. 22:43]

Í reglugerð um starfsemi veiðifélaga kemur fram að:  Afl atkvæða ræður úrslitum mála á fundum.  Þó verður breyting á samþykkt eða arðskrá að hljóta 2/3 hluta atkvæða.  Þetta þýðir að ef allir hefðu mætt á fundinn hefði þurft 13 atkvæði til að samþykkja að stofna veiðifélag.  Á stofnfundinn mætti Árni Ísaksson forstjóri lax og silungssviðs Fiskistofu og flutti hann upplýsandi erindi um gerð arðskrár.  Árni staðfesti að helming atkvæða þyrfti til að samþykkja stofnun veiðideildar.  Veiðideildin er því löglega stofnuð.

[Halldór Jónsson, 21.6.2009 kl. 13:04]

39. gr. Stofnun veiðifélags.
Þar sem ekki er starfandi veiðifélag fyrir geta einn eða fleiri veiðiréttarhafar átt frumkvæði að stofnun veiðifélags og boðun stofnfundar, en að þeim frátöldum [Fiskistofa].¹⁾
Til stofnfundar skal boða alla þekkta veiðiréttarhafa á fyrirhuguðu félagssvæði, sbr. 12. gr. Ráðherra skal í reglugerð²⁾ setja nánari ákvæði um boðun stofnfundar og dagskrá hans. Til annarra funda en stofnfundar í veiðifélagi skal boða með sama hætti.
Á stofnfundi skal setja veiðifélagi samþykktir sem hafa a.m.k. að geyma ákvæði um:
   a. nafn félags,
   b. heimilisfang og varnarþing,
   c. félagssvæði og skulu þar taldar upp allar þær fasteignir eða einstaklingar og lögaðilar sem veiðiréttindi eiga skv. II. kafla laga þessara,
   d. verkefni félagsins,
   e. skipun og starfssvið félagsstjórnar,
   f. málsmeðferðarreglur, reikninga félags og endurskoðun,
   g. skyldu til framlagningar fjárhagsáætlunar fyrir komandi starfsár á aðalfundi félags,
   h. meðferð afla félags eða arðs og greiðslu kostnaðar af starfsemi félags.
Ráðherra skal í reglugerð²⁾ setja veiðifélögum fyrirmynd að samþykkt í samræmi við efni málsgreinar þessarar.
Í samþykktum má ákveða að félag skuli starfa í deildum, enda taki hver deild yfir tiltekið veiðivatn eða hluta vatns. Hver deild ráðstafar þá veiði í sínu umdæmi með þeim skilyrðum sem aðalfundur félagsins setur.
Atkvæði ²/3 hluta allra atkvæðisbærra félagsmanna þarf til þess að samþykktir séu löglega gerðar eða þeim breytt. Sé fundarsókn ekki næg skal boða til annars fundar með sama hætti og að framan greinir, og ræður þar afl atkvæða.
Hafi veiðifélag ekki sett sér lögmætar samþykktir, þrátt fyrir ákvæði greinar þessarar, getur [Fiskistofa]¹⁾ sett félagi samþykktir sem gilda þar til lögmætar samþykktir hafa verið settar af félaginu sjálfu.
Sá er vefengja vill lögmæti stofnaðs veiðifélags getur borið ágreining þar að lútandi undir dómstóla innan sex mánaða frá stofnfundi.
Samþykkt skv. 3. mgr. skal staðfest af [Fiskistofu]

Stofnun veiðideildar var löglega felld á þessum stofnfundi. Þú getur því ekki boðað annan fund og samþykkt til dæmis ein og sér að stofna deildina. Hvað þá að búa til samþykktir. Þetta stenst bara ekki hvað sem þú heldur að Árni Ísaksson hafi sagt.

Drífa mín, það gengur ekki hjá þér að bjóða bara fram  hörkuna sex ! En svara engu efnislega.

Með bestu kveðjum 

[Einar H. Björnsson, 21.6.2009 kl. 13:04]

Drífa, það má vel vera að ég hafi tekið fullstórt upp í mig þegar ég fullyrti að öll hrygning í ánni væri dæmd til að mistakast.  Það er afar líklegt að einhver hrygning takist á vatnasvæðinu, sérstaklega þá í hliðaránum ofan Faxa.  Sjálfsagt þarf lengri tíma og rannsóknir á svæðinu til að ganga úr skugga um hvort sú hrygning skipti raunverulega einhverju máli með tilliti til heildarmyndarinnar.

Sé litið til þess tíma sem veiði er leyfð í ánni, 20. október, er ólíklegt að veiðirétthafar og leigutaki hafi mikla trú á að hrygning skili árangri.  Það væri fróðlegt að fá upplýsingar frá þér, Drífa, hve margir laxar veiddust ofan Faxa af þessum 2.400 sem veiddust á sl. ári.

Fyrir okkur, áhugamenn um stangaveiði, er það auðvitað blóðugt að horfa upp á netabændur á Ölfusár-Hvítársvæðinu moka upp laxi sem er á leið til heimkynna sinna á vatnasvæðinu og gildir þá einu hvort um sé að ræða fisk af náttúrulegum stofni eða úr hafbeit.  Varla geta veiðiréttareigendur um Tungufljótið verið ánægðir með það, að eftir því sem þeir kosta meiru til í seiðasleppingum, þá aukist tekjur netabændanna neðar á vatnasvæðinu!

[Drífa Kristjánsdóttir, 21.6.2009 kl. 13:33]

Sæll Einar.  Það er gaman að segja þér frá því að 657 laxar veiddust ofan Faxa á síðasta sumri.   Rúmlega 2400 laxar fóru um laxastigann en menn halda að sami laxinn hafi talist oftar en einu sinni og því er talið að um 1300 laxar hafa gengið upp fossinn Faxa.  Veiði í Tungufljóti var engin áður en Árni Baldursson breytti laxastiganum.

Veiðifélagið Faxi gerði samning við Árna fyrir fimm árum síðan, um að sleppa laxaseiðum í Tungufljótið.  Árangur seiðasleppinganna varð margfalt betri en menn höfðu gert sér í hugarlund.  Árangurinn kom öllum í opna skjöldu og vakti flestum eigendum Tungufljóts ánægju. 

[Einar H. Björnsson, 21.6.2009 kl. 14:31]

Sæl Drífa.  Einhver misskilningur virðist vera hér á ferðinni um laxagöngur upp laxastigann við Faxa, eða þá að upplýsingarnar frá teljaranum hafi reynst rangar.  Samkvæmt þínum upplýsingum þá veiddust 657 laxar ofan Faxa sl. sumar, en samkvæmt meðfylgjandi skýrslu Veiðimálastofnunar þá gengu 672 laxar upp stigann, (nettó) þegar dregnir hafa verið frá þeir fiskar sem gengu niður aftur.  Samkvæmt þessu voru aðeins 15 laxar eftir ofan Faxa þegar veiðum lauk sl. haust!  Ef þetta eru réttar tölur, sem ég reyndar efast um, þá er ekki mikils árangurs að vænta í ræktunarmálum árinnar.

http://www.veidimal.is/files/Skra_0035458.pdf